O secretario de gandeiría de UPA e secretario xeral comarcal de Deza- Tabeirós, Román Santalla, participa hoxe en París na reunión bilateral entre a Interprofesional Láctea (INLAC) e Cniel (Centro Nacional Interprofesional da Economía Leiteira), a súa homóloga francesa.
Alí, Santalla porá de manifesto a importancia de reestruturar en profundidade o sector lácteo no horizonte do ano próximo 2015, no que se porá fin ás cotas lácteas para dar paso ao mercado libre.
Desde UUAA, insístese na reformulación do paquete lácteo introducindo a figura do mediador, que terá capacidade para arbitrar nas relacións de compra-venda entre gandeiros e industria do sector lácteo. Coa fin de cotas, os gandeiros galegos corren o risco de quedar sen garantía de recollida e sen prezo para o leite. Para evitar esta situación, UUAA propón que a fin dos contratos non coincida co 1 de abril do ano que vén, momento no que desaparecerá o sistema de cotas. Unha iniciativa xa subscrita polo sector lácteo francés.
A nivel internacional, o sindicato agrario propón a reestruturación do mercado sen cotas e no plano nacional, evitar a medra da burbulla especulativa. Na actualidade, máis do 80% das explotacións galegas non teñen contrato de venda e polo tanto, caen en mans da especulación que trafica con cisternas de leite por debaixo de custes. Para evitar esta problemática, pídese ao goberno español que harmonice este último ano con cotas lácteas co obxectivo de que o aumento da produción sexa progresivo e beneficioso tanto para grandes coma para pequenos gandeiros.
Roberto García, secretario xeral de Unións Agrarias, mantivo unha reunión a principios de mes no Ministerio de Agricultura, encontro no que o líder do sindicato manifestou o momento especialmente delicado que comporta a presente campaña láctea.
Deja un comentario