A falta dunha análise polo miúdo, a nova Lei da Cadea Alimentaria supón unha xerra de auga fría para o agro galego e do Estado, ao non prohibir que industrias e intermediarios poidan seguir pagando prezos en orixe por baixo dos custes de produción. Desta maneira, o Ministerio de Agricultura avala as prácticas mafiosas de industrias como moitas do sector lácteo que, na actualidade, pagan o litro de leite a un prezo medio de 31 céntimos, un valor moi por debaixo dos 40 céntimos que custa producilo e que está levando a moitas explotacións do noso país á ruína.
A Lei da Cadea Alimentaria achega aspectos positivos, como tipificar de infracción moi grave, con multas entre 3.001 e 100.000 euros, “o incumprimento de prazos de pago nas operacións comerciais de produtos alimentarios”. Coa nova lei na man, serían sancionadas empresas como Lácteos Tambre, que xa foi embargada por non pagar o leite de varias entregas a moitas das explotacións que lle fornecían; Alimentos Lácteos, que adebeda case medio ano aos seus provedores; ou adegas da denominación de orixe Rías Baixas como Gran Bazán, Lagar da Condesa, Sucesores de Benito Santos ou Núñez Andión, que aínda non pagaron a vendima de 2011 a viticultores e viticultoras, cando a Lei contra a Morosidade obriga a pagar antes dun mes os produtos perecedoiros.
A pesares de avances coma este, de saír para adiante a Lei da Cadea Alimentaria co texto aprobado polo Consello de Ministros do pasado venres, 9 de febreiro, as industrias terían as mans libres para pactar e impoñer prezos de miseria ás explotacións que, por riba, estarían fixados nun contrato. Así, a nova Lei da Cadea Alimentaria supón un torpedo na liña de flotación dos acordos acadados no sector lácteo trala folga de entregas de novembro. Acordos que, por certo, están a ser sistematicamente incumpridos precisamente polas industrias, que manteñen os prezos estancados moi por baixo dos custes de produción e que, como xa teñen demostrado, non van ceder nas súas prácticas abusivas de non ser que se lles obrigue cunha lei que, por desgracia, non vai ser a da Cadea Alimentaria se mantén o texto aprobado polo Consello de Ministros.
O Sindicato Labrego Galego, xunto coas outras organizacións agrarias, ten vontade de seguir defendendo os acordos acadados no sector lácteo trala folga de entregas de novembro e a alegación presentada pola Xunta diante do Ministerio de Medio Rural pedindo, entre outras cousas, que se regule a prohibición de vender produtos agrogandeiros por baixo dos custes de produción. Por iso, as tres organizacións agrarias decidiron solicitar encontros coa Consellaría de Medio Rural e co presidente da Xunta, Alberto Núñez Feijóo, para que fagan as xestións necesarias de cara a que a prohibición de vender por baixo de custes sexa introducida na Lei de Cadea Alimentaria durante a súa tramitación parlamentaria.
Deja un comentario