O anuncio feito polo Secretario Xeral do MAPA, Josep Putxeu no sentido de que o consello de ministros deste venres aprobará sen cambios sustanciais o Plan Lácteo é unha mala noticia para o sector en Galicia. O anuncio foi feito polo dirixente ministerial nunha asemblea xeral de ASAJA celebrada en Madrid
Para Xovenes Agricultores resulta decepcionante ver como os políticos, empezando pola ministra, veñen aquí tan so a enganarnos. Hai que lembrar que Elena Espinosa dixo que non se ía aprobar ningún plan que fose en contra dos intereses de Galicia. Nese mesmo senso se pronunciou o presidente da Xunta, Pérez Touriño e tampouco quedou á zaga o conselleiro de Medio Rural, Suárez Canal.
Xóvenes Agricultores, xunto coas outras organizacións agrarias entrevistárase co Conselleiro de Medio Rural e co Presidente da Xunta e protagonizou varias manifestacións, unha delas diante da Delegación do Goberno na Coruña. Ademàis, a nosa organización ten solicitada unha reunión coa propia Ministra para expoñerlle o noso sentir sobre este tema, aínda que agora xa non ten moito sentido si non ten pensado cambiar nada.
E triste ver como o sector lácteo é utilizado para sacar votos, primeiro en Galicia e agora no resto das comunidades autónomas que teñen eleccións na próxima primavera. E entre tanto aos pobres gandeiros impídeselles producir leite aínda que estean dispostos a gastar os seus cartiños en mercar cota, dado que o MAPA cortou toda posibilidade de compravenda entre particulares e por outra parte non deixa acceder á cota doutras autonomías a través do coñecido instrumento chamado Banco de Cotas.
De todas formas esperemos que tras as eleccións antes mencionadas, as augas volvan ó seu rego e unha vez máis se modifique esta normativa de coxuntura electoralista pois, a estas alturas de campaña, o incremento de cota a través do Banco xa a podemos dar por perdida, dado que nin podemos optar á cota de fóra e a dos que se acolleron en Galicia prácticamente xa está producida polos que se acolleron ao abandono.
Santiago, 13 de decembro de 2006
Deja un comentario