O SLG anuncia novas mobilizacións a prol da consecución dun contrato homologado que fixe un prezo base mínimo para o leite

Onte, Carme Freire Cruces, Secretaria Xeral, e Mariano Pazos Currais, membro da Executiva e produtor de leite, anunciou as mobilizacións que, dentro da campaña a prol dun prezo xusto para o leite galego, terán lugar o vindeiro día SETE DE AGOSTO.

As explotacións galegas en xeral, e as de leite en particular, están a vivir unha gravísima crise, denunciada reiteradamente pelo Sindicato Labrego Galego, provocada pola escalada de custes de produción e o establecemento dun contrato homologado sen prezo base mínimo, que deixou ás gandeiras e gandeiros nas mans das industrias, ao promover a negociación individual en detrimento da colectiva.

Arestora, xa están anunciadas baixadas no prezo para o mes de agosto e outono, cando o habitual até o momento viña sendo un repunte no prezo do leite a estas alturas de campaña.
Dende o SLG rexeitamos a complicidade que os Gobernos galego e estatal se está a manter coas industrias lácteas, así como o poder monopolizador da FENIL para establecer prezos que inviabilizan a posibilidade de poder vivir das nosas explotacións.

É por iso que o vindeiro xoves sete de agosto nos concentraremos perante da Consellaría do Medio Rural, Ministerio de Medio Ambiente, Medio Rural e Medio Marino e da FENIL, para reivindicar a CONVOCATORIA DUNHA MESA DE NEGOCIACIÓN na que se aborden solucións para as explotacións de leite e se establezan prezos xustos que remuneren o traballo de labregas e labregos ao tempo que se cobren os custes de produción, como se entende xusto para calquera traballador ou traballadora.