FRUGA: Unha mobilización do sector da carne o martes día 18 demandará o fin dos recortes nas axudas por parte da xXunta de Galiza

En abril de 2008, a Consellería do Medio Rural (CMR) no goberno bipartito, sacaba unha liña de axudas destinada ao fomento de produción das razas gandeiras autóctonas en réximes extensivos, en concordancia coas políticas que recomenda a Unión Europea: unha aposta por unha produción de alimentos sans e de calidade.

Deste xeito, a CMR e os titulares das explotacións gandeiras asumían durante cinco anos unha serie de compromisos: os/as gandeiros/as comprometíanse a cumprir medidas que fomentaban as razas autóctonas en base á superficie e, a cambio, a CMR comprometíase ao pago de ata 156 € anuais por animal reprodutor.

O Partido Popular, unha vez que asumiu o goberno galego, dado que non podía eliminar estas axudas, comezou un constante recorte dos importes que reciben os labregos/as (xa na campaña 2011 o retallamento chegou a un 45% sobre a cantidade inicial), pero foi na campaña correspondente ao ano 2012 que, aínda agora se ven de resolver, cando a “machada” do executivo de Núñez Feijoo mostrou a súa peor cara.
Nesta anualidade, sobre o 75% das solicitudes de renovación de compromisos no ano 2012 quedaron fora das axudas, iso si, unha vez que as explotacións afectadas si que cumpriron coas súa obrigas.

Esta non é a primeira machada que recibe o sector de vacún de carne nos últimos anos, os continuos recortes e a posterior non renovación do Contrato de Explotación Sustentable (CES), a paralización do BANTEGAL e a non defensa dos intereses das granxas galegas no próxima reforma da PAC e que vai supoñer menos ingresos dos actuais, sumada ao constante suba dos costos de produción e o conxelamento dos prezos que reciben os/as labregos/as, fan que o descenso da renda das explotacións de carne sexa máis que preocupante.

Nunha primeira xuntanza para tratar este tema o pasado venres en Bacerreá, acordouse que os afectados/as alí presentes ían recurir esta decisión a través dun recurso que a Federación Rural Galega-FRUGA xa está poñendo a disposición de todos/as os/as afectados/as que así o desexen. Do mesmo xeito, para facer presión, tamén se decidiu organizar unha mobilización o vindeiro martes día 18 ás 12:00 diante da delegación da Xunta de Galiza en Lugo, que é onde se atopan a maior parte dos expedientes comentados e rexeitados anteriormente.

Desde a Federación Rural Galega-FRUGA, continuaremos facendo máis xuntanzas informativas nas principais comarcas afectadas para que esta acción de protesta sirva para facerlle ver ao Sr. Núñez Feijoo, que lle debe un respecto ao sector do vacún de carne, una actividade que emprega a 9.000 familias e que é a principal actividade económica en moitas comarcas galegas.

Do mesmo xeito, tamén agardamos que outros axentes se sumen a esta iniciativa e poder así facer canta máis forza mellor, para así esixir unha corrección por parte da Xunta de Galiza e a aprobación de todas as solicitudes que, cumprindo cos requisitos, poden quedar fora desta axuda.