As elevadas temperaturas e a ausencia de precipitacións rexistradas neste verán ocasionaron unha redución do 40% na produción do millo forraxeiro, o que se traduce en perdas de mais de 35 millóns e medio de euros. Este cultivo, fundamental na dieta do gando vacún, xa resultara gravemente afectado polas excepcionais condicións de humidade e frío da pasada primavera que ocasionaron retrasos na sementeira avaliados naquel momento en perdas de 14,4 millóns de euros.

Ás consecuencias derivadas das chuvias da primavera que obrigaron aos agricultores a sementar variedades de ciclos máis curtos e polo tanto de menor rendemento engádese agora a redución da produción por mor das altas temperaturas e da falta de chuvia no verán, polo que as perdas acumuladas ascenden ata o momento a uns 50 millóns de euros, á espera do tempo que veña ata a colleita a finais de setembro ou primeiros de outubro. Así pois, as explotacións gandeiras de Galicia, especialmente ás das comarcas do interior, deben facer fronte a esta adversidade e buscar novas fontes de alimentación para o seu gando logo dun ano nefasto, no que ademais dos danos no millo se perdera un corte de herba e a campaña de ensilado de herba fora de mala calidade por mor das excesivas choivas e baixas temperaturas da primavera.

A produción de millo perdida nas case 70.000 hectáreas cultivadas en Galicia debe ser substituída polo aproveitamento dos pastos e pola compra de pensos de fora de explotación. Neste sentido, e co obxectivo de non incrementar os custos de produción do leite e da carne, Unións Agrarias solicita a suspensión da prohibición de pastorear en terreos afectados por incendios e denuncia o retraso inxustificado da baixada do prezo dos pensos, xa que a pesares da redución da cotización das materias primas nos mercados nestas últimas semanas os gandeiros seguen pagando o mesmo pola alimentación para os seus animais. Ao contrario do que acontece cando se experimentan subas nas cotizacións das materias primas que son trasladadas inmediatamente ao prezo dos pensos.