Xóvenes Agricultores considera necesario e urxente consensuar unha postura no noroeste peninsular de cara a reforma da PAC aprobada onte na reunión do Consello de Ministros da UE.

Neste senso, a vindeira semana terá lugar unha reunión das organizacións agrarias coa Consellería de Medio Rural.

O futuro do sector lácteo dependerá da capacidade de Galicia para liderar as reivindicacións do sector.

XXAA valora positivamente os cambios producidos na reforma da PAC respecto da proposta inicial da Comisión.

A superficie elixible a nivel estatal queda limitada á declarada no ano 2011 (22,4 millóns de Has), o que evita unha redución da axuda por hectárea, na que Galicia sairía moi prexudicada.

Por outro lado, a eliminación da taxa plana, que obrigaría a igual nivel de axuda por hectárea (converxencia) para todos os agricultores, posibilita o mantemento das axudas para determinados sectores:

Os pequenos agricultores, que reciban ata 1.250 € anuais non estarán obrigados á converxencia interna, que se establece nun mínimo do 60 % para cada rexión produtiva (por determinar).

As axudas acopladas, fundamentais nos sectores lácteo e cárnico, tampouco estarán suxeitas a converxencia, polo que se abre a posibilidade de manter o nivel das mesmas.

As esixencias medioambientais vense igualmente moi suavizadas respecto da proposta inicial

A flexibilidade otorgada aos estados membros fai fundamental chegar a posturas de consenso en Galicia e na Cornisa Cantábrica, polo que XXAA espera chegar a un acordo co resto de organizacións agrarias e coa propia Consellería de cara ás negociacións a nivel nacional co Ministerio de Agricultura.

O peso que representa o sector lácteo galego a nivel nacional debe marcar as pautas de calquera acordo estatal