Viticultores e fruticultores en alerta polas xeadas

O sindicato UUAA fai unha chamada de atención a Xunta de Galicia para que estableza unha cadencia na liquidación de impostos e débedas daqueles produtores que nestes días están a sufrir nas súas colleitas os efectos da climatoloxía adversa desta primavera. Do mesmo xeito, desde o sindicato ponse de manifesto a necesidade de impulsar, e non recortar como se está a facer, por parte da Consellería de Medio Rural o financiamento dos seguros agrarios como a única arma efectiva contra estas continxencias.

As producións máis afectadas son as vitivinícolas nas Denominacións de Orixe Ribeiro, Monterrei e Ribeira Sacra nas que se prevén fortes caídas tanto na cantidade como na calidade da uva, polo nivel de afectación que sufriron as cepas que estaban en floración. Nunha primeira valoración estímase para as zonas citadas un nivel de afectación de arredor do 60% cunha incidencia en danos de case o 40% da produción. Todo apunta a unha primeira cuantificación de danos que pode achegarse aos 20 millóns de euros en perdas.

Tamén o sector froiteiro veu como se perden moitas súas opcións de mercado sobre todo nas froitas temperás. Así os plantíos de pexegos e cereixas perderon gran parte da flor polas xeadas co que se esperan caídas nas zonas de produción como son as Rías Baixas. No caso da hortas mazá e pera de mesa a principal zona afectada é a de A Estrada, onde de seguir os rigores climáticos tamén se poden ver prexudicadas as mazás destinadas a elaboración de sidra.

Finalmente, as comarcas que adiantaron a sementeira de patacas, aproveitando semanas atrás o cese das choivas, perderon gran parte das plantas que empezaban a agromar o que supón en moitos casos novos gastos para replantar a semente botada a perder.

Dadas as graves incidencias que se están a producir, desde UUAA instase aos agricultores que documenten nas oficinas da organización as perdas para poder iniciar os trámites para procurar as compensacións e axudas que alivien a súa situación.