Unións Agrarias ven de denunciar as prácticas novamente usureiras da totalidade das industrias lácteas en Galicia, xa que están obrigando aos gandeiros a renunciar a negociación anual do prezo do leite tendo que acollerse ás vantaxistas e especuladoras liquidacións a mes vencido.

Esta práctica que ten como obxectivo manter inalterable o “dereito de pernada” das industrias sobre os produtores, é posible grazas a unha disposición incluída na Lei da Cadea Alimentaria recentemente aprobada polo Goberno de Mariano Rajoy. Así, neste texto contemplase a posibilidade de que o gandeiro renuncie ó dereito a coñecer a cómo lle vana pagar o leite durante todo o ano, manténdose deste xeito a fixación de prezo mensual.

Desde UUAA advirteuselle ao ministro Arias Cañete de que esta disposición ia ir en proveito da industria xa que conta cunha posición de forza na negociación. Máxime cando nesa negociación o produtor non dispón dun factor de equilibrio como é a figura dun mediador –como si hai en Francia- que arbitre un prezo xusto para as partes en caso de desacordo.

Desde o sindicato faise un novo chamamento ao Presidente da Xunta de Galicia para que sen esquecer a importancia de procurar solucións a Alcoa ou Navantia, invista algo do seu tempo en procurar reflotar o sector lácteo antes do seu colapso definitivo. No aleiro están non só 11.000 explotacións e 65.000 empregos senón a base económica do 50% dos concellos de Galicia e a xestión e ordeación do 80% do territorio.

UUAA tamén invita ás industrias lácteas de capital galego a unha reflexión sobre a súa actitude de complicidade no exterminio da actividade gandeira, no sentido de que cando en Galicia non queden produtores, as industrias galegas tampouco serán necesarias porque o leite circulará, xa envasado, nun mercado internacional que non precisará deles.