Xóvenes Agricultores aproveitou a xuntanza da súa Executiva, celebrada hoxe en Santiago, para valora-lo nomeamento de José Antonio Santiso Miramontes como novo conselleiro de Política Agroalimentaria. Na reunión estimouse como positivo e esperanzador o talante de diálogo amosado polo mesmo nas súas primeiras declaracións públicas.

“Sabemos que o novo Conselleiro é un bo coñecedor do mundo rural, froito da súa experiencia á fronte de distintos grupos de acción local e de estár a fronte dun concello predominantemente rural; por iso agardamos que traslade eses coñecementos á súa actuación á fronte da Consellería”, sinalou o secretario xeral de Xóvenes Agricultores, Juan Pérez Miramontes.

“En Xóvenes Agricultores poñémonos á súa disposición e esperamos reunirnos con el canto antes para falar de tódalas preocupacións que hoxe teñen os nosos agricultores e gandeiros, nun momento especialmente difícil a causa dos elevados custos de produción e dos baixos prezos pagados ó produtor”, apuntou Pérez Miramontes.

Nese sentido, a Executiva da organización agraria serviu para definir algunhas desas grandes cuestións que se lle plantexarán ó novo Conselleiro, coma a aplicación da nova PAC, o proceso de reconversión do sector lácteo, a reestructuración do viñedo ou o difícil momento que viven os produtores cárnicos. Igual mente, agárdase que J. A. Santiso teña unha especial sensibilidade no capítulo da formación.

Santiago, 10 de setembro de 2004